Við óskum þér og þínum gleðilegra jóla og farsældar á komandi ári með innilegri þökk fyrir stuðninginn á árinu sem er að líða. Skrifstofa Geðhjálpar verður lokuð frá 23. desember til 2. janúars en við höldum ótrauð áfram í okkar starfi og hér eru nokkur verkefni sem við munum halda áfram með á nýju ári.
Okkar heimur er verkefni sem býður upp á stuðning og fræðslu fyrir börn foreldra með geðrænan vanda. Verkefnið er að breskri fyrirmynd (Our time) og hefur Geðhjálp unnið að innleiðingu þess sl. ár.
Geðlestin er samstarfsverkefni Geðhjálpar og Hjálparsíma Rauða krossins 1717. Geðlestin er geðfræðsla fyrir nemendur í efri bekkjum grunnskóla sem byggir á þeirri staðreynd að öll erum við með geð, rétt eins og við erum með hjarta.
Um er að ræða geðræktandi dagatal á þorranum sem Geðhjálp stendur fyrir. Markmiðið er að styrkja geðheilsu landsmanna og þannig verja okkur og styrkja í mótbyr. Með daglegri inntöku G-vítamíns myndum við sterkara ónæmi, því þessi einföldu ráð eru verndandi þættir geðheilsu.
Geðhjálp stóð fyrir undirskriftasöfnun árið 2020 á 39.is þar sem skorað var á stjórnvöld að setja geðheilbrigðismál í forgang aðgerða. Undirskriftirnar voru afhentar stjórnvöldum ásamt þeim 9 aðgerðum sem samtökin leggja áherslu á til að koma geðheilsu í forgang.
Tilgangur sjóðsins er að stuðla að framförum í geðheilbrigðismálum með því að veita styrki til verkefna sem geta bætt geðheilbrigði landsmanna og skilning á málaflokknum. Í október sl. var úthlutað í fyrsta skipti úr Styrktarsjóði geðheilbrigðis, en 15 verkefni hlutu alls 10 m.kr. styrk úr sjóðnum.
Frá því að heimsfaraldurinn braust út höfum við þurft að laga okkur að breyttum tímum, meðal annars með því að gera ráðgjöf Geðhjálpar aðgengilega með aðstoð tækninnar. Ráðgjafar og starfsmenn Geðhjálpar sinntu yfir 1.100 erindum á þessu ári.
Hafðu það sem best yfir hátíðarnar og kærar þakkir fyrir stuðninginn á árinu sem er að líða.
