Hallgrímur Hrafnsson starfar sem jafningi í geðrofs- og samfélagsgeðteymi Landspítalans. Hann býr yfir eigin reynslu sem notandi geðþjónustu síðan 1998 og hefur séð ýmsar góðar breytingar í geðþjónustu síðan þá en tækifærin til bóta eru enn mörg og brýn. Hallgrímur er virkur þátttakandi í samfélagi jafningja, en hann hefur oft séð hve öflug sú nálgun getur verið og hefur mikla trú á jafningjasamfélaginu sem hefur verið að blómstra síðan byrjun árs 2023.
Hallgrímur hefur á undanförnum tveimur árum öðlast mikinn áhuga á geðheilsu og umbótastarfsemi í þágu notenda geðsviðs og hefur á þeim tíma sótt ýmsar ráðstefnur, vinnustofur og málstofur bæði í persónu og á netinu varðandi betri leiðir í geðþjónustu. Sú reynslu hefur veitt honum byr undir báða vængi hvað varðar mögulega framtíð geðþjónustu á Íslandi og víðar.
Hann trúir á einstaklingsbundin bataferli þar sem hver og einn fær tækifæri til að feta sína eigin slóð í átt að betra lífi. Hallgrímur er einnig í fjarnámi hjá Yale háskóla í bandaríkjunum að læra breytingastjórnun fyrir fólk með lifða reynslu og ætlar sér að nýta það nám til ýmissa verkefna í samstarfi við jafningja, félagasamtaka og Landspítala. Hann bauð sig fram í stjórn Geðhjálpar vegna þess að hann vill bæta geðrækt og vinna gegn fordómum á Íslandi.
